Bänkk 2013

Dr Fuessbauer Ronaldo het es riese Puff dihei
Aues ligt ume ä riese Souerei
Die Wohnig luegi nur so drii
Wiu är ou mau wett Messi sii


Z Töchterli vom Alex Frei
Grännet dr ganzi Tag dihei
Was mir da gseh – das isch kei Troum
Dr Öpfu gheit nid wit vom Boum


Am Mörgeli wird wägem Museums Bricht
Kündet und är geit vor Gricht
Är seit är sig dr einzig Ma
Wo Liiche darf im Chäuer ha


Vo Gurmus, Chonoufinge, Riggisbärg
Loupe, Gränche u vo Aarbärg
Im Hotel Murte chasch die aui gseh
Aber Murtner gsehsch dert keini mee


Piccard u Boumgartner – wär isch wär
Dr Ungerschied dä isch nid schwär
Dr Österricher isch dä wome nid versteit
U jetz grad us dr Chapsle gheit


Bi Google frag i mi sofort
Isch äch das es wiiblechs Wort
Es wärdä Dir scho Vorschläg gmacht
Bevor i z’Sätzli ha fertig gmacht


Mini Frou chouft im Coop Lasagne i
Nachem Nachtässe isch aues angersch gsi
Im Näscht da muessi mi jetze spuute
Di geit mir ab wine wiudi Stuute


Mir wöi z’Beschte für üsi Schiifahrer u hei üs dänkt
u heine üsi Kostüm gschänkt
Si hei zwar ou so viu Ziit verlore
Aber wenigschtens heisi nüme gfrore


Dass dr Papscht nüm wott ufem Thrönli hocke
Tuet aui Katholike schocke
Mir finges super s’isch e Säuteheit
We e Dütsche vo alleini geit


Wosch Gäud verdiene aber nid lang schaffe
Jetz wärde es paar vo euch blöd gaffe
Spiusch 3 Wuche dört dr Gloon
Bechunsch in Sion 2 Jahr Lohn